قصر اوهام.... بقلم الاستاذ المبدع محمد درديري
قَـَصْر أوْهَامْ
أنا الشاعر
ببيع أحاسيس
إشي ضحكه
واشي دمعه
ونار بتقيد
ومهجه عايشه ف اللوعه
جيوش أحلام ما تتحقـَّق
إلا َّ ما بين سطر الكلام
أنا القاري كل الوشوش
بدون مكياج وأي رتوش
@@@@@@
انا الشاعر
ببيع احاسيس
انا القادر
على وصفْ الدموع
وأوجاعها على خد الجميل
ف ليل أشواق وليل عاشق
صاحبه بعد الهجر ملل ليله الطويل
واحلام تتولدعلشان بتحقيقها تتكفـِّن
وفي الفرقه كلامي سلسله فضـَّه
ما بين حلقاتها مغزوله
مشاعر قلب عبيط
ودموعه كام دقـَّه
واقف وبيودع حبيب هَجَرُه
وبالذكرى
شـَمَّر المهجه واتوضى
@@@@@@@@
انا الشاعر
تمللي مسافر
ما بين الضحكه والآهه
ما بين فشل القلوب في الحب
وبين أحاسيس في نقاهه
انا المجبر على الأحزان
انا المغصوب على الأفراح
انا اللي بَعِـدْ نجوم الليل
ف ساعة ِوحْدِةالعاشق
وبُعْدْ سيادة المعشوق
انا اللي تمللي ليه مخنوق
بسيرة العشق والعشـَّاق
مين واصل
ومين فارق
ومين مشتاق
انا اللي دموعي سيل جارف
وانا بكتب حكايةحب
وكل نهايه انا عارف
وكل ضحكه ضاحكينها
ف ليلة شوق
بكتبها قبل طلوعها م الفرحه
انا دمعة قلوب مكسوره بين عشـَّاق
انا فرحة الطرحه
ولون فساتنهم الأبيض
كلمة بُـعْدْ متعاجبه
ساعة الوداد طارحه
أشواك هَجْـرْ ودموع
ومهجه م الهموم سارحه
لكنِّي برضه انا راضي
بإنِّي مخللي احلامي
وقصة حبي ف الآخِـرْ
انا الشاعر
ببيع أحاسيس
إشي دمعه
واشي ضحكه
جيوش احلام ما تتحقـَّقْ
ما بين سطر الكلام
انا الشاعر
بعيش ديما
ف قصر بانيه من الأوهام
الشاعر : محمد درديري
تعليقات
إرسال تعليق