«هايروحي» بقلم الاستاذ كريم الزيرجاوي

((( هايروحي )))
"""""""""""""""""""""""   شعر شعبي عراقي وعذرا من لم تصله اشارتي

هايروحي
اشكد صبرتي .... وتالي مليتي الصبر
هايروحي
اشكد سهرتي .... وذبل جفوني السهر
ردت اشوفك يافجر
وردت احجي بهيده لخيوط الكمر
خطوه خطوه
وساعه ساعه
تفرهد وظاع العمر
انت ياعيد الفرحتي ...... ثوبج يصير الجمر
ماعرفت الوكت مايرضه العذر
وماعرفت الناس مليانه غدر ( حاشا الله الطيبين )
وانته ياجدمي شمشيت
هم تجي ساعه وترد تحت الصفر
هايروحي
شمااطش ضحكاتي بين الناس ماالهن قدر
هايروحي
وصرتي مثل الغيم من ينزل مطر
وهم صرت مثل الورد ....كل كتر انثر عطر
وصرت مثل الشلب بالطين انثر
وياما ياما للمحابس فرحتج صارت شذر
هايروحي
سولفيلي همومج شكد وشكثر
بس يروحي
طشي للوادم محبه وصيري نسمات الفجر
وصيري غناوه وشعر
وصيري مثل امي يروحي تبخر البيت العصر
عفيه روحي
اخذي من عكلي الامر
حتى لو دنياج تعصرني عصر
حتى لو وياج وكتي يصير مر
بس اضحكي
ولو بيج اجروح ماطابن خضر
ولو شفتي الظيم والعيشه العسر
يلي سامحتي الشماته من الزغر
هذا طبعج يل حنينه
وتنزل دموعج ...كفر
هايروحي
والعسر بعده يسر
ان شا الله
العسر بعده اليسر

((( الزيرجاوي )))
""""""""""""""""""""""